Аппликейшн ажиллуулахын тулд таны хурууны хээ хэрэгтэй

Урт гэгчийн нууц үг чээжилдэг байсан үе ард хоцрох цаг ойртсоор. Андроид үйлдлийн системийн дараагийн хувилбар болох “М” загвар нь хурууны хээгээр таних системийг бүрэн нэвтрүүлэх гэж байна.
Монголын цагаар Баасан гаригт Сан Франциско хотноо эхлэх Google I/O чуулган дээр компани Андроид М үйлдлийн системээ танилцуулна. Уламжлалын дагуу компани чихэр, жимсний нэр ашиглах учир энэ удаад “Маффин” буюу аягатай жигнэмэг гэж нэрлэж магад.
iOS хэрэглэгчдэд танил болоод удаж буй хурууны хээ таних системийг Андроид ийнхүү нэвтрүүлж байгаа ч зөвхөн хурууны хээ мэдрэгчтэй төхөөрөмжид л ашиглах нь мэдээж. Өнөөдрийн байдлаар Samsung Galaxy Note 4, S6/S6 Edge, HTC One Max болон Motorola-гийн хэд хэдэн загварууд хурууны хээ уншигчтэй үйлдвэрээс гарч байгаа.
Гэхдээ удахгүй Андроид утаснууд бүгд хурууны хээ мэдрэгчтэй болох биз. Царай таних систем төдий л яваагүй, хурууны хээ таних систем илүү хурдан, хэрэглэхэд хялбар учир Google дараагийн үйлдлийн системд энэ горимыг ашиглах гэж байгаа аж.
Эх сурвалж: Mashable