Буудуулсан хохирогч эрэгтэй нас баржээ

Өчигдөр буюу хоёрдугаар сарын 3-ны 11 цагийн үед Налайх дүүргийн Хаан банкны салбар тооцооны төвд хоёр хүн буудуулсан ноцтой хэрэг гарсан билээ. Тус банкны салбарын эрхлэгч Туяагийн нөхөр н.Батбаатар зэвсэглэсэн буутай этгээдийн өөдөөс эхнэрийнхээ өмнүүр орж хэвлийн тус газраа буудуулан хүнд шархдсан юм. Буудуулсан эрэгтэйд яаралтай мэс засал хийхээр Цэргийн нэгдсэн эмнэлгийн мэс тасгийн нарийн мэргэжлийн эмч нар нийслэлээс очсон бөгөөд мэс заслын явцад хохирогчийн биеийн байдлын талаар Налайх дүүргийн эрүүл мэндийн нэгдлийн дарга Б.Өлзийсайхан “Сум хэвлийг нэвт гарсан учир бие нь их хүнд байна. Өрөөсөн бөөрийг нь авсан. Бусад эд эрхтэндээ нөлөөлж байгаа учир хүндрэлтэй байгаа. Бид бололцоотой бүх арга хэмжээг авч байна. Нарийн мэргэжлийн таван эмч ажиллаж байна” гэх мэдээллийг хэвлэлийнхэнд өгч байсан юм. Цус их алдсанаас гадна хэд хэдэн эрхтэн гэмтсэн түүний хагалгаа зургаан цаг гаруй үргэлжилсэн ч харамсалтай нь мэс заслаас хойш ердөө 30 минутын дараа буудуулсан эрэгтэйн зүрх зогсч, амьсгал хураажээ.