Дуучин Becky мисс Х.Бадамгэрэлээс гурав, дөрвөн шатаар илүү

Олны танил хосуудын тоог нэмээд буй дуучин Becky, мисс Х.Бадамгэрэл нар тун ч романтик үерхдэг. Хаана ч явсан бай, хамаагүй. Бие биеэ хөтлөн, ихэд дотноор алхах дуртай тэднийг найз нөхөд нь “Ёстой л хоёр биедээ тохирсон сайхан хос” гэж амаа олохгүй магтдаг аж. Оюутолгойд томоохон алба хашиж явсан дуучин залуу өдгөө “Fashion Channel Mongolia” телевизийн гүйцэтгэх захирлын алба хашдаг төдийгүй мэдлэг боловсролын хувьд хэнээс ч дутахааргүй гэгддэг.

Энэ нь ч үнэн байх. Учир нь, түүний хайрыг булаасан мисс Х.Бадамгэрэл өнгөрсөн хугацаанд хэвлэлийнхэнтэй уулзах болгондоо “Миний ирээдүйн хань мэдлэг боловсролын хувьд надаас гурав, дөрвөн шатаар илүү байх ёстой” гэж ярьдаг байсан. Загвар өмсөгч залуутай үерхээд хэдэн сарын нүүр үзсэн ч, санаанд нь хүрээгүй тул хоёр тийш болсондоо огт харамсдаггүй мисс бүсгүй хэсэг хугацаанд ганц бие явсан.

Харин найз нөхдийн харилцаанаас хайр дурлалын романс үүсгэх хүртлээ дотноссон дуучин Becky түүнээс гурав, дөрвөн шатаар илүү байсан учраас ийн сонгогдсон нь дамжиггүй биз ээ. “Азийн модель” агентлагийн гүйцэтгэх захирал, багш Х.Бадамгэрэл ийнхүү өөрөөсөө хэдэн шат илүү хүнтэй учирсан болохоор ирээдүйн амьдралаа ч төлөвлөхөд бэлэн байгаа гэсэн шүү.