“Гурван охин” хамтлаг энэ жил киногоор “занимаалдав”

Энэ жилийн дөрвөн сард “Жинхэнэ хайр” тоглолтоо хийн, урлагийн ертөнцөд өөрсдийн гэсэн орон зайтайгаа харуулсан “Гурван охин” хамтлаг энэ жилийн зун, намрыг киногоор “занимаалдаж” өнгөрөөлөө.
Хамтлагийн гишүүн Ану SBN сувгийн “Гэр” цуврал киноны “Гэгээ” дууг дуулсан нь үзэгч, сонсогчдын зүгээс өндөр үнэлгээ авсан. Киноны продюсерууд анхнаасаа залуухан, царайлаг дуучнаар киноныхоо дууг дуулуулъя хэмээн ярьж байсан нь яв явсаар Ану дээр сонголт нь нийлсэн гэдэг. Ану итгэлийг нь эвдэлгүй дууг хит болгосон нь өдгөө youtube.com дээр давхардсан тоогоор 60 орчим мянган удаа эгшиглэжээ.
Хамтлагийн гишүүн Анхмаа өөрийн дурлалт ханхүү, жүжигчин Т.Билэгжаргалын хамтаар “Франц үнсэлт” кинонд чадварлаг тоглож, авьяаслаг жүжигчин гэсэн үнэлгээг үзэгчдээс авсан. СУИС-ийг кино жүжигчний мэргэжлээр суралцаж төгссөн тэрээр саяхан дахин нэгэн шинэ киноны урилга хүлээн авсан байна.

Хамтлагийн ахлагч Соло дуучин Болдтой хамтран “Хагацаж чадах уу?” дуу дуулсан нь удахгүй дэлгэцнээ гарах “Учиртай гурван толгой” уран сайхны киноны дуу юм байна. Хитийн жагсаалтанд дээгүүр явж байгаа энэ дуу удахгүй тоглогдох “Монгол поп” тоглолтонд дуулагдана.