МЭДЭЭ - 146 оноо авсан тоглолт гарлаа.

“Пэпси D” хөгжлийн лигийн тойргийн тоглолтууд БТС-ын заалнаа амжилттай үргэлжилсээр байна. Өнгөрөгч амралтын өдрүүдэд өрсөлдөөнтэй сонирхолтой тоглолт хэд хэд гарсан. А хэсэгт өрсөлдөж байгаа Мобиком 94, Улс төрийн тойм багуудын тоглолт эдгээр тоглолтуудын нэг байлаа. Тоглолт эхнээсээ л өгөө аваатай өрсөлдөж 79:80 харьцаатайгаар Улс төрийн тойм багийн ялалтаар өндөрлөжээ. Ингэснээр Улс төрийн тойм хожлынхоо тоог нэгээр нэмж хэсгийн тавд бичигдэж байна.

Тус баг лигийг тааруухан эхлүүлсэн ч бүсийнхээ бүх топ багуудад хожиж ийнхүү байр ахилаа. Харин 2012 оны эхний өдөр буюу 1-р сарын нэгэнд явагдсан сүүлийн тоглолт Ad Market Соёмбо даатгалын Ноёд багуудын хооронд болсон. Хэсгийг тэргүүн баг Ноёд энэ удаад 146 оноог авч хөгжлийн лигийн дээд амжилтыг тогтоолоо. Харин В хэсгийг SBL нэг ч хожигдолгүй тэргүүлж байсан ч НМХГ-тай тоглож 77:67 харьцаатайгаар анхны ялагдлаа хүлээснээр хэсгийн гуравдугаарт бичигдэх болсон байна. Ганцхан хожигдол хүлээхэд 2-3 байраар доошилж байгаа нь Пэпси D лигийн тоглолтууд хэрхэн өрсөлдөөнтэй явагдаж байгааг батлан харууллаа.