“Miss Mongolia-2012” тэмцээний ялагчаар Д.Дөлгөөн тодорлоо

2004 оноос хойш жил бүр уламжлал болон зохиогдож буй “Miss Mongolia-2012” тэмцээн өчигдөр болж өндөрлөлөө. Тус тэмцээний финалын шатанд олон улсын гоо бүсгүй шалгаруулах тэмцээнүүдэд тавигддаг зураг авалт, алхаа гишгээ, илтгэх уран чадвар, хэлний мэдлэг гээд олон шалгуурт тэнцэж 20 гоо бүсгүй тунаж үлдээд байсан юм. Тэднээс эх орноо төлөөлөн Олон улсын “Мiss international-2012” тэмцээнд оролцох үндэсний ялагчаар хувийн дугаар 19 Д. Дөлгөөн тодорч титмийн эзэн болсон юм. Тэргүүн мисс Д.Дөлгөөнд “Мисс Монголиа-2011” ялагч гоо бүсгүй И.Төгсөө титмийг зүүж өгч амжилт хүссэн юм. Мисс Д.Дөлгөөний хувьд Удирдлагын академийн Төрийн удирдлагын сургуульд сурдаг,21 настай бүсгүй юм.Түүний биеийн жин 52 кг бөгөөд 180 см өндөр, биеийн харьцаа нь 87х65х92 аж. Энэ жилийн тэмцээний нэгэн онцлог нь мисс модел, мисс фото, мисс авъяас, мисс бикини, мисс спорт шалгаруулснаас гадна оюунлаг мисс, ухаалаг мисс, тусч мисс зэрэг номинацууд нэмэгдэж орсноороо онцлог болсон юм. Үндэсний ялагч мисс Д.Дөлгөөн ирэх сарын 1-21-нд Японы Окинавад болох “Мiss international-2012” тэмцээнд оролцоно.