“Сүнс”-ийхэн 9911-тэй дугааруудаа хэрэггүй гээд хаяжээ

Монголын хамгийн ууган Boy групп болох “Сүнс” хамтлагийн залуус өнгөрсөн намар 20 –н жилийнхээ ойг тэмдэглэсэн. Эрдэнэтээс гаралтай залуус 90-ээд оны эхээр олны үлгэр дуурайлал болсон одууд байлаа. Тиймээс ч дөнгөж үүд хаалгаа нээгээд байсан үүрэн холбооны тэргүүлэгч оператор Mobicom-ын удирдлагууд 9911-тэй дугаараа рекламдан борлуулалтыг нь нэмэх гэж “Сүнс”-ийн дөрвөн залууд нэг нэг 9911-тэй дугаар бэлэглэж.

Тухайн үедээ гар утас гээчийг тэр бүр сайн ойлгоогүй байсан залуус нилээд гайхасхийн бэлэгээ авч ээ. Хамтлагийн ахлагч Лхагваа тухайн үедээ мода болж байсан “S-4” гэдэг утас авч өнөөх 9911-тэй дугаараа суулган гар утастай хүнийн жаргалыг эдлэн баруун солгойгүй утас цохин нэг хэсэгтээ л дэгжирч. Гэтэл сарын дараа тоо томшгүй их төлбөр гарч гар утастай ганган залууг ухаан алдуулах шахсан байна. Тиймээс хамтлагаараа зөвлөлдөж, хуралдаж байгаад хэтэрхий их төлбөр гарч хоосолж мэдэх эд байна гээд өнөөх 9911 –тэй дугааруудаа огт хэрэггүй гээд хаяцгаачихсан байна.

Харин одоо тэд энэ үйлдэлдээ маш их харамсаж явдаг бөгөөд 9911-тэй дугаар 30-100 сая хүрсэн энэ үед ядаж зарсан бол аштай юу гэцгээж амаа барьсан гэнэ.