Ухаантай гэдгээ бусдадаа харуулаач

“Тэнэг хүнтэй тэрсэлдэж битгий ноцолд” гэсэн Монгол ардын зүйр цэцэн үг бий. Энэ үгийг өнөө цагт, нийслэлийн замын хөдөлгөөнд оролцож буй хүн бүр ягштал баримталмаар санагдах юм. Шууд хэлбэл хэн нэгэн "тэнэг"-ийн бусдаасаа урьтаж уулзвар нэвтрэх гэсэн оролдлогоос үүдэн осол аваар гарч бүтэн өдрийн түгжрэл, замын хөдөлгөөний саатал үүсч байна. Үүссэн нөхцөл байдлыг зохицуулах замын цагдаа нь хагас өдрийн дараа ирж асуудлыг шийдэх гэж мунгинадаг. Энэ хоёр үйлдлээс үүдэн хэдэн зуун хүний ажил, амьдрал хагас едрөөр хойшилж түгжирч, гацсан зам дээр өнгөрч байна. Нийслэлийн өнгө төрх гэвэл ердөө л энэ.

Тэгэхээр түгжрэл үүсгэж байгаа тэнэгүүдийн өмнө ухаантнууд яах ёстой вэ. Өөдөөс эрчээрээ ирэх тэдний урдуур гишгэх бус дүрэм журмын дагуу хөдөлгөөндөө оролц. Өрсөж давхилдах жолооч нарыг өнгөрөөсний дараа таны өмнө аюулгүй, түгжрэлгүй зам бий болно. Нэг ёсондоо та өөрийгөө тэднээс дээгүүрт тавьж тэнэгүүдийг урдуураа өнгөрөөснөөр илүү их боломжийг эдлэх юм. Ухаантай хүмүүс тэнэгүүддээ бууж өгдөг ч амьдралаас алддаг нь үгүй. Ухаантай гэдгээ бусдадаа харуулаач!